د فرهنګي ميراثونو د ساتنې ملي ورځ په بلخ کې ونمانځل شوه
د بلخ د اطلاعاتو او فرهنګ رياست نن په دغه ولايت کې د فرهنګي ميراثونو د ساتنې ملي ورځ ونمانځله.
د باختر آژانس د سيمه یيز خبريال د خبر له مخې؛ په هغې غونډه کې چې په همدې مناسبت په مزارشريف ښار کې جوړه شوه؛ د بلخ د والي مرستيالې ربابې نايبي په داسې حال کې چې د دغه ولايت د اطلاعاتو او فرهنګ رياست هلې ځلې وستايلې، افغانستان د ټولو ګډ کور او د هغه بډای فرهنګ د دغه هېواد د خلکو د وياړلې ژوندانه څرګندوی وباله .
ربابې وويل: په ټول هېواد کې تاريخي او فرهنګي آثار او آبدې شته چې د افغانستان د خلکو د بډاى او لرغوني فرهنګ ښکارندوی دي.
د بلخ د اطلاعاتو او فرهنګ رييس مطيع الرحمن کريمي په خپله وينا کې وويل چې ۲۰ کاله مخکې افغانستان خپل يو فرهنګي او تاريخي شتمني يعنې د باميانو د بوډا مجسمې د طالبانو له خوا او د پرديو په اشاره له لاسه ورکړې.
کريمي د اطلاعاتو او فرهنګ رياست د بلخ د ارزښتناکو تاريخي شتمنيو پر ساتنې ژمن وباله او ويې ويل: ټاکل شوې ده د اطلاعاتو او فرهنګ رياست په نږدې راتلونکي کې د مولانا جلال الدين محمد بلخي د پلار د خانقا، د افغانيه جومات د جوړولو او په دغه ولايت کې د تاريخي څلو او لرغونو ساحو د ترميم کار پيل کړي .
د يو بل خبر له مخې:
د فرهنګي ميراثونو د ساتنې ملي ورځ په زابل او پکتيا کې هم د يوشمېر دولتي مسوولينو او فرهنګيانو په ګډون ونمانځل شوه.
کابل / د کب ۲۰ مه / باختر
