راه ماندګار ورځپاڼې نشراتي فعالیت بیا پیل کړ

farzad_moicgovaf
یکشنبه ۱۳۹۹/۱۱/۱۲ - ۱۵:۳۲
راه ماندګار ورځپاڼې نشراتي فعالیت بیا پیل کړ

ماندګار ورځپاڼې له يوکلن ځنډ وروسته نن د راه ماندګار په نامه بيا په خپلو خپرونو پيل وکړ.

د باختر اژانس خبريال د خبر له مخې؛ په هغې غونډه کې چې په همدې مناسبت نن د اطلاعاتو او فرهنګ وزارت په تالار کې جوړه شوې وه د اطلاعاتو او فرهنګ وزارت سرپرست محمد طاهر زهير په خپلو خبرو کې د راه ماندګار په نامه د ماندګار ورځپاڼې د خپرونو بيا پيل، د بيان ازادۍ د بنسټيز کېدو لپاره يو مثبت ګام وباله او ويې ويل: موږ فرهنګي ودې ته اړتيا لرو او له فرهنګي ودې پرته نه شوکولاى ثبات، سولې او امنيت ته ورسېږو .

هغه وويل: فرهنګ په يو هېواد کې د هغه هېواد ټوله شتمني ده او فرهنګ دى چې د يو هېواد د پرمختګ او ودې سبب کېږي او موږ غواړو  چې فرهنګ له  حاشيې څخه متن ته راوړو .

هغه زياته کړه: زموږ سياست د فرهنګ وده او پراختيا ده او په هېواد کې اوسنۍ رسنۍ يو نعمت دى او چاپي رسنۍ په تېره بيا ورځپاڼې زموږ د ټولنې يوه جدي اړتيا ده او د ورځپاڼو ټولې ستونزې منو او هغه څه چې د وزارت په توان کې دى د هغو ملاتړ کوو .

اطلاعاتو ته د لاسرسی کمېسيون رييس عين الدين بهادري وويل: د هېواد په حساسو شرايطو کې د يوې ورځپاڼې  پرانیستل يو ښه او د ستاينې وړ اقدام دى. راه ماندګار همغه ماندګار ورځپاڼه ده چې پخوا یې فعالیت کاوه .

هغه وويل: د بيان ازادي د يو فرد بنسټيز حق دى، په نړۍ کې دموکراسي په  بيان ازادۍ پورې تړلې ده او دغه ازادي د دموکراتيکو دولتونو یوه ښه کونجي ده. هغه وويل د بيان ازادي د هيڅ فرد او ډلې په زيان نه ده .

د مشرانو جرګې لومړي نايب محمد علم ايزديار وويل: ماندګار ورځپاڼه د هېواد د مطبوعاتو په ډګر کې ځانګړى ځاى لري او دغه ځاى خوندي دى او دغه ورځپاڼه يوه ډېره په زړه پورې ورځپاڼه وه .

هغه زياته کړه: ماندګار ورځپاڼې ١١ کاله مخکې خپل کار په نقد او اصلاح کولو پيل کړ او د دموکراسۍ د ودې، له تروريزم سره د مبارزې او له فساد سره د مبارزې لپاره یې لیکنې وکړې او په دې لاره کې یې ګام واخیست او د خلکو د حقوقو د ساتنې په سنګر کې ودرېده او د هېواد تودې سياسي مسئلې يې خپرې کړې .هغه هيله څرګنده کړه چې راه ماندګار ورځپاڼه به دغه لاره تعقيب کړي .

وروسته د اطلاعاتو او فرهنګ وزارت د خپرونو چارو معين عبدالمنان شيواي شرق وويل: د راه ماندګار په نامه د ماندګار ورځپاڼې د خپرونو بيا پيل د هېواد په مطبوعاتو کې يو مهم او ارزښتناک ګام دى او دغه ورځپاڼه مهم رسالت ترسره کوي.

هغه د دغې ورځپاڼې له مسوول څخه وغوښتل چې د ماشوم، کورنۍ، اروا پوهنې، طنز او کاريکاتور برخې پکې ځاى کړي .

هغه په دې غونډه کې د غوره خبريال د جايزې خبر ورکړ او ويې ويل: موږ په پام کې لرو چې په راتلونکې کال کې  غوره خبريال ته  ٥٠٠ زره افغانى جايزه ورکړو او ټول خبريالان، فلم اخیستونکي او عکاسان کولاى شي ځانونه کانديد کړي .

هغه څرګنده کړه: په رښتيا هم يوشمېر خبريالان له ګواښ سره مخ دي او موږ د رسنیز تروريزم په وړاندې د هغوى ملاتړ کوو.

په همدې حال کې د راه ماندګار ورځپاڼې مسوول مدير نظري پرياني وويل: ماندګار ورځپاڼه په ١٣٨٨ کال کې تاسيس شوه  او له يوولسو کلونو خپرونو وروسته د کرونا د خپرېدو او نورو دليلونو له امله په تېر ژمي کې له خپرونو څخه پاتي شوه او له يوکلن ځنډ وروسته یې نن  يوځل بيا د راه ماندګار په نامه خپلې خپرونې پيل کړې . هغه وويل: راه ماندګاربه  په نوي او متفاوت ډول خپل کار پرمخ وړي .

هغه د اطلاعاتو او فرهنګ له وزارت څخه وغوښتل چې د چاپي رسنيو د مالياتو د ورکولو ستونزې ته پاملرنه وکړي .

د ازادو رسنيو  د ملاتړ بنسټ اجرايي رييس  مجيب خلوتګر وويل: په هېواد کې د څو رسنيو  په تړل کېدو سره  موږ نن د راه ماندګار په نامه د يوې ورځپاڼې او په روزګان کې د يو ټلويزيون د فعاليت د پيلېدو شاهدان يو او په اوسنيو حساسو شرايطو کې دا د بيان ازادۍ د پیاوړتیا لپاره د هيلو  يوه دريڅه ده.

کابل/ دسلواغې ١٢مه/ باختر

تازه ترین اخبار

یکشنبه ۱۴۰۰/۱/۲۲ - ۱۴:۱۲
Background image

دین اسلام آزار و اذیت را ناروا پنداشته است

آمریت جندر وزارت اطلاعات و فرهنگ به همکاری موسسه ارتقای ظرفیت های نور(نکدو) کارگاه آگاهی دهی در مورد محو آزار و اذیت جنسی را از دیدگاۀ اسلام برای کارمندان معینیت جوانان این وزارت راه. . .

یکشنبه ۱۴۰۰/۱/۲۲ - ۱۳:۱۹
Background image

ششمین جلسۀ کمیسیون برگزاری سمینار بین المللی پاچا خان برگزار شد

به ریاست محمد طاهر زهیر، سرپرست وزارت اطلاعات و فرهنگ ششمین جلسۀ کمیسیون برگزاری سمینار علمی و بین المللی پاچا خان امروز برگزار شد.

به گزارش آژانس باختر؛ محمدطاهر زهیر در این جلسه بر. . .

شنبه ۱۴۰۰/۱/۲۱ - ۱۴:۱۳
Background image

مشاعره ریدی گل در کندز برگزار شد

محفل مشاعره یی زیر نام ریدی گل در کندز دیروز برگزار شد.

به گزارش آژانس باختر؛ این محفل را نهاد «پسرلی ادبی او کلتوری ټولنه» در چمن ریاست شاروالی کندز با حضور رییسان اداره های دولتی،. . .

BACK TO NEWS