ننګرهار کې ۷ قلمه نيول شوي آثار د موزيم آمريت ته وسپارل شول
چهارشنبه ( ۱۰ د شعبان ۱۴۴۵) د ننګرهار ولايت په طورخم فرضي کرښه څو ورځې وړاندې نيول شوي ۷ قلمه آثار چې د اطلاعاتو او کلتور رياست ته سپارل شوي و، نن رسماً د موزيم آمريت ته د ساتنې په موخه وسپارل شول.
د ننګرهار ولايت د اطلاعاتو او کلتور رياست مسؤلين وايي: څو ورځې وړاندې ۷ قلمه آثار په طورخم فرضي کرښه کې د اسلامي آمارت د مجاهدينو له لوري نيول شوي و، چې د مجاهدينو له لوري د ننګرهار ولايت د اطلاعاتو او کلتور رياست ته سپارل شوي و، نن د اطلاعاتو او کلتور رئيس قاري احسان الله ساجد له لوري د ختيځ زون د موزيم آمريت ته د ساتنې په موخه وسپارل شول.
د ختيځ زون د موزيم آمريت مسؤلين وايي: دغه توکي به د یو پلاوي له لوري تشخیص او وروسته به په ډیپو کې ځای پر ځای شي.
