د فريلانسنګ برخه کې ۹۰ تنو ځوانانو زده کړې پيل شوې
د ننګرهار ولايت د اطلاعاتو او کلتور رياست او وای، اېچ، ډي، او موسسې په ګډې همغږۍ د فريلانسنګ برنامې لپاره له ۳۵۰ تنو ځوانانو څخه ازموېنه اخيستل شوې وه، چې تېره ورځ ۹۰ تنه بريالي شويو ځوانانو ته عملاً درسونه پيل شول.
د ننګرهار ولايت د فريلانسنګ برنامې د پرانستې په مراسمو کې د اطلاعاتو او کلتور رئيس مولوي نور محمد حنيف بريالي شويو ځوانانو ته د مبارکۍ ورکولو ترڅنګ وويل؛ له وای، اېچ، ډي، او موسسې څخه مننه کوم، چې د ننګرهار ځوانانو ته يې د فريلانسنګ په برخه کې د وړيا زده کړو زمينه برابره کړې، د تکنالوژۍ په دې عصر کې فریلانسنګ ته ډېره اړتيا محسوسېږي.
د وای، ايچ، ډي، او موسسې استازي وويل: تېره ورځ مو له ۳۵۰ ځوانانو څخه د فريلانسنګ برنامې د پيل په موخه ازموېنه واخيستله، بريالي شوي ځوانان مو انټرويو ته راوغوښتل او له انټرويو وروسته ۹۰ تنه انتخاب او نن ورته عملاً درسونه پيل شول، چې د مجربو او مسلکي استادانو له لوري به ورته يو مياشتنۍ زده کړې ورکول کېږي.
۱۴۴۵/۵/۱۸ هـ ق
۱۴۰۲/۹/۱۱ هـ ش
