د اطلاعاتو او کلتور وزارت پلاوي د مولانا جلالالدین محمد بلخي د پلار د خانقاه د بیارغونې چارو څخه ليدنه وکړه
د اطلاعاتو او کلتور وزارت د تاریخي آبداتو رئیس انجینر محمد حسیب نسيمي د بلخ ولایت د اطلاعاتو او کلتور رئیس مولوي محمدالله ضرار سره یوځای د مولانا جلال الدین محمد بلخي د پلار د خانقاه د بیارغونې له روان بهیر څخه لیدنه وکړه.
د دغې لیدنې پر مهال د تیکا دفتر رئیس د دې تاریخي ودانۍ د اوسني وضعیت، د بیارغونې د روانو چارو او د راتلونکو پلانونو په اړه هر اړخیز معلومات وړاندې کړل او ويې ویل: هڅې کېږي، چې رغنیزې چارې د ودانۍ د اصلي بڼې په ساتلو سره ژر تر ژره بشپړې شي.
ورته مهال د بلخ ولایت د اطلاعاتو او کلتور رئیس مولوي محمدالله ضرار وويل: تاریخي آبدې د هېواد د فرهنګي هویت مهمه برخه جوړوي او ساتنه یې د راتلونکو نسلونو لپاره د ارزښتمند میراث د خوندي کولو په معنا دي، د امارتي ادارو او همکارو بنسټونو ترمنځ همغږي کولای شي، د تاریخي ځایونو د ساتنې بهیر لا چټک او اغېزمن کړي.
د یادونې وړ ده، چې د مولانا جلالالدین محمد بلخي د پلار خانقاه د بلخ ولایت له مهمو تاریخي او فرهنګي ځایونو څخه شمېرل کېږي، چې د بيارغونې چارې يې اوس مهال دوام لري.
۱۴۴۷/۸/۲۴ هـ ق
