د زمري۲۴مې (د فتحې ورځې) په مناسبت پر دېوالونو د لیکنو لړۍ پیل شوې ده
د هېواد د اطلاعاتو او فرهنګ ولایتي ریاستونو مسوولینو وایي، چې د زمري۲۴مې (د فتحې ورځې) په مناسبت پر دېوالونو د حماسي او ملي شعارونو لیکلو لړۍ پیل شوې ده.
د اطلاعاتو او فرهنګ ریاستونو مسوولین وايي، چې دغه پر دېوالونو لیکنې د خپلواکۍ د پنځمې کلیزې په مناسبت ترسره کېږي او ټاکل شوې ده؛ چې د ښارونو په ګڼ مېشتو او له ګڼېګوڼې ډکو سیمو کې د آزادۍ، اسلامي ارزښتونو او ملي یووالي په اړه پیغامونه ولیکل شي.
مسؤلینو زیاته کړه، چې د دې اقدام موخه یوازې د ښارونو ښکلا نه ده، بلکې هڅه کېږي چې د خلکو ترمنځ د خپلواکۍ غوښتنې روحیه پیاوړې، د هېواد د دفاع په برخه کې د مسوولیت احساس ژوندی او د ملي ارزښتونو د ساتنې انګېزه لا پیاوړې شي.
د مسوولینو په وینا؛ د افغانستان خلک مجاهد پروره، باعزته او د آزادۍ غوښتونکي دي، چې د تاریخ په اوږدو کې یې د خپلو نیکونو د قربانیو او سرښندنو له لارې د بېلابېلو اشغالګرو پر وړاندې مقاومت کړی او د هېواد خپلواکي او عزت یې ساتلی دی.
مسؤلینو ټینګار وکړ، چې د دې ویاړلي تاریخ ساتنه او راتلونکو نسلونو ته یې لېږدول د ټولو افغانانو ګډ مسوولیت دی.
۱۴۴۸/۲/۲۱ هـ ق