ریاست آژانس اطلاعاتی باختر

باختر آژانس

باختر آژانس د افغانستان د اسلامي جمهوريت يوازينى خبري بنسټ دى چې په  ١٣١٨ هجري لمريز کال کې د وخت د مطبوعاتو د مستقل رياست په چوکاټ کې د باختر آژانس د لوى مديريت  په توګه جوړ شوى دى.

باختر آژانس د خپل ژوندانه د کابو ٨٠ کلونو په بهيرکې له لوړو او ژورو سره مخامخ شوى دى، خو په دې بريالى شوى دى چې خپل ماموريت په ښه توګه ترسره کړي.

باختر آژانس د خلق او پرچم د حکومت په دوران کې د باختر آژانس د دولتي کميټې په نامه د يو خپلواک بنسټ په توګه دنده ترسره کړې ده چې وروسته د لوى  رياست په توګه چې په چوکاټ کې يې د کورنيو خبرونو رياست، د بهرنيو خبرونو رياست، د عکاسۍ رياست، د پښتو اطلاعاتو رياست، د تخنيک رياست، د سياسي تحليل رياست، د تصحيح او تحقيق رياست، د راډيوګانو  مديريت  او  څو نورو څانګو په مرکز او نورو ولايتونوکې فعاليت کړى دى چې په مرکز او ولايتونوکې کابو ٥٠٠  تنه خبريالان او کارکوونکي لرل. خو د اداري اصلاحاتو په پيل سره د دغه لوى رياست تشکيل په مرکز او ولايتونوکې بيخي کم شو.

همد ا اوس باختر آژانس په مرکزکې له٥٠ تنو خبريالانو او کارکوونکو سره او په ولايتونوکې له کابو ٧٠ تنو خبريالانو سره د دولت د برياليتوبونو په منعکس کولو بوخت دى.

د باختر آژانس رياست دويمه رتبه بست دى او په خپل تشکيل کې څلور آمريتونه لري چې د کورنيو خبرونو آمريت، د بهرنيو خبرونو آمريت، د ولايتونوآمريت او د ويب سايټ آمريت دى.

د کورنيو خبرونو، د سياسي تحليل، عکاسۍ او د خبرونو د تصحيح او تدقيق مديريتونه د کورنيو خبرونو د آمريت په چوکاټ کې، د ملي او بهرنيو ژبو ژباړونکي د بهرنيو خبرونو د آمريت تر نظر لاندې فعاليت کوي، خو د ويب  سايټ  آمريت خبرونه، رپوټونه، تحليلونه، ژباړنې او عکسونه  په  پښتو، دري  او انګليسي ژبو چاپوي چې زيات لوستوونکي لري چې د فيسبوک، تويتر او  د خبرونو د ګوګل پلس په ګډون د ټولنيزو رسنيو له لارې هم خپريږي.

د ولايتونو آمريت، د هېواد د  ٣٣ ولايتونو خبرونه او رپوټونه برابر او له ايديت  وروسته د دولتي رسنيو له لارې خپروي.

د کورنيو خبرونو مديريت، د کابل ټول خبرونه برابر او منکعس کوي، د ژباړونکو له خوا په پښتو او انګليسي ژبو له ژباړنې وروسته خپريږي او کله ناکله له پښتو ژبې څخه په دري او انګليسي ژبې ژباړل کيږي او خپريږي.

د باختر آژانس د سياسي تحليل مديريت، په ورځ کې له دوو څخه تر دريو  پورې د سياسي تحليل، تبصري او په خبر تفسيرونه ليکي او خپروي يې. په دغو تبصروکې د هېواد او سيمې د ورځې د پيښو په وړاندې د دولت د دريځ  په باب رڼا اچول کيږي او د دښمن تبليغات او پروپاګندونه د دغه مديريت له لارې شنډيزي.

د تصحيح او تدقيق مديريت، ټول خبرونه او رپوټونه د ژبې د دستور املا او انشاء او د نامه او ځاى د تصحيح له پلوه تدقيق کوي او وروسته د فکس او انترنت مديريت له خوا دولتي رسنيو ته ايمل کيږي.

د باختر آژانس د عکاسۍ مديريت، هره  ورځ  د هېواد د مرکز او ولايتونو له غونډو څخه په لسګونو عکسونه اخلي او د خبر ترڅنګ خپريږي.

د باختر آژانس د عکاسۍ مديريت د عکس د نګتيف يو آرشيف لري چې له ٥٠ کلونو را په دې خوا په زرګونو عکسونه پکي ساتل کيږي، خو دغه نګتيفونه  په بد حالت کې  دي. که چيرې ديجيتل نه شي، له منځه ځي.

د ژباړونکو مديريت، خبرونه له دري ژبې څخه پښتو ژبې ته او له پښتو ژبې څخه دري ژبې ته او له انګليسي ژبې څخه د هېواد ملي ژبو ته او له ملي ژبو څخه انګليسي ژبې ته ژباړي او خپروي يې.

باختر آژانس په ورځ کې کابو ١٠٠ خبرونه، رپوټونه، مرکې، سياسي تحليلونه، تبصرې، په خبرتفسيرونه، ورځپاڼو ته کتنې، عکسونه او د خبر نور نورمونه  برابر او د هېواد، انيس، اصلاح، کابل ټايمز او د وطندارانو ورځپاڼو او ملي راډيوټلويزيون او دغه راز د خبر دويمې شبکې ته ليږي چې هغوى له دغو مواردو څخه استفاده کوي.

دغه راز شخصي رسنۍ هم د باختر آژانس له توليداتو څخه استفاده کوي.

تاسی کولی شی چه دباخترآژانس  دویب سایت نوی خبرونه  ولولی

ختم