ننګرهار کې د (خیال نوښت) په نوم راډیو په فعالیت پیل وکړ
د ننګرهار ولایت د کابل کمپ په سیمه کې د (خیال نوښت) په نوم نوې سیمه ییزې راډیو په ۹۲.۱ څپو کې په فعالیت پیل وکړ.
د ننګرهار د اطلاعاتو او فرهنګ رئیس مولوي ذبیح الله نوراني، د یادې راډیو مسؤلینو ته مبارکي وویله او د رسنیو د ودې او پیاوړتیا لپاره یې د مناسب رسنیز چاپېریال پر رامنځته کولو ټینګار وکړ.
نوموړي زیاته کړه، چې رسنۍ د خلکو ترمنځ د معلوماتو رسولو، عامه پوهاوي او د ټولنې د ستونزو او غوښتنو د انعکاس په برخه کې مهم رول لري، له همدې امله د رسنیو مسؤلین باید خپلې خپرونې د مسلکي معیارونو، اسلامي او ملي ارزښتونو په پام کې نیولو سره وړاندې کړي.
د ښاغلي نوراني په وینا؛ د اطلاعاتو او فرهنګ ریاست هڅې کوي، چې له رسنیو سره د همغږۍ او همکارۍ زمینه لا پراخه کړي.
ورته مهال د یاد راډیو مسؤل خیال نور حیران د دغې راډیو د فعالیتونو او خپرنیزو پروګرامونو په اړه معلومات هم وړاندې کړل.
دغه راز د ننګرهار د اطلاعاتو او فرهنګ ریاست د اطلاعاتو آمر وویل: اوس مهال په ننګرهار کې د ملي راډیو ټلوېزیون په ګډون ۱۷ راډیوګانې، څلور ټلوېزیونونه، درې چاپي او ګڼ شمېر ټولنیزې رسنۍ فعالیتونه ترسره کوي.
۱۴۴۸/۳/۱۸ هـ ق
